Riyaad (Dawan)- Wasaaradda Arrimaha Dibadda ee Boqortooyada Sacuudiga ayaa bayaan ay maanta soo saartay ku eedeeysay dowldda maaraadku ay ka caawiyasay ciidamada Golaha Kumeelgaarka Koonfureed inay fuliyaan howlgallo militari oo ka dhacay xuduudda koonfureed ee Sacuudiga, gaar ahaan gobollada Xadramaawt iyo Mahra ee Yemen.
Bayaankan, oo ah kii ugu horreeyay ee Sacuudigu si toos ah ugu jeediyo eedeyn culus oo siyaasadeed Imaaraadka, ayaa lagu sheegay in tallaabooyinka ay Abu Dhabi ka waddo gobolladaas ay yihiin halis toos ah oo ku wajahan amniga qaranka Sacuudiga, isla markaana ay khatar ku yihiin ammaanka iyo xasilloonida Yemen iyo guud ahaan gobolka.
Wasaaradda Arrimaha Dibadda Sacuudiga ayaa ku tilmaantay ficillada Imaaraadka kuwo aad u khatar badan, waxayna carrabka ku adkaysay in ammaanka qaranka Sacuudiga uu yahay khad cas, isla markaana aysan boqortooyadu ka laba-labeyn doonin inay qaaddo dhammaan tallaabooyinka iyo habraacyada lagama maarmaanka ah si loo wajaho loona joojiyo khatar kasta oo taabanaysa amnigeeda.
Bayaanku wuxuu intaas ku daray in waxa Imaaraadku ka wado Xadramaawt aysan waafaqsaneyn mabaadi’da uu ku dhisnaa Isbahaysiga Taageerada Sharciyadda Yemen, isla markaana ay tahay tallaabo ka hor imaaneysa dadaallada lagu doonayo xasillooni iyo amni waara oo ka hanaqaada Yemen.
