Safiirka cusub ee Jabuuti oo billaabay howlaha Danjirenimo ee Soomaaliya

Muqdisho (Dawan) – Wasiirka Arrimaha Dibadda iyo Iskaashiga Caalamiga ah ee Soomaaliya, Cabdisalaam Cabdi Cali, ayaa Muqdisho kaga guddoomay safiirka cusub ee Jamhuuriyadda Jabuuti u fadhiya Soomaaliya, Col. Cismaan Dhoobad Suugoole, warqadaha aqoonsiga diblomaasiyadeed, tallaabo rasmi ah oo muujinaysa bilowga howlaha danjirenimo ee safiirka cusub.

Wasiirka ayaa safiirka cusub ku qaabilay xafiiskiisa Wasaaradda Arrimaha Dibadda iyo Iskaashiga Caalamiga ah ee Soomaaliya ee Muqdisho.

Kulanka labada dhinac ayaa looga hadlay xiriirka ka dhexeeya Soomaaliya iyo Jabuuti, iyadoo si gaar ah diiradda loogu saaray xoojinta iskaashiga laba geesoodka ah, arrimaha diblomaasiyadda, xasilloonida gobolka iyo danaha wadajirka ah ee Geeska Afrika.

Soomaaliya iyo Jabuuti ayaa leh xiriir taariikhi ah oo ku dhisan derisnimo, dhaqan wadaag iyo iskaashi siyaasadeed. Jabuuti ayaa muddo dheer kaalin muhiim ah ku lahayd taageeridda dowlad-dhiska Soomaaliya, dadaallada nabadda iyo howlaha amniga ee gobolka, iyada oo ka tirsan ciidamada nabad-ilaalinta Midowga Afrika ee ku sugan Soomaaliya, kuwaas oo loogu magac daray “Hiil Walaal”.

Magacaabista safiirka cusub ayaa ku soo beegmaysa xilli labada dal ay wadaan dadaallo lagu sii xoojinayo xiriirkooda diblomaasiyadeed iyo iskaashiga ku saabsan amniga, dhaqaalaha, isu-socodka bulshada iyo arrimaha gobolka.

Wasaaradda Arrimaha Dibadda Soomaaliya ayaa sheegtay in kulanka uu muujinayo sida ay labada dowladood uga go’an tahay sii adkeynta xiriirka walaaltinimo iyo iskaashiga istaraatiijiga ah ee Soomaaliya iyo Jabuuti.