Safiirka Midowga Yurub ee Soomaaliya oo soo gabagabeysay muddadii shaqadeeda

Muqdisho (Dawan)- Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, ayaa kulan sagootin ah la qaatay Safiirka Midowga Yurub ee Soomaaliya, Francesca Di Mauro, kaddib markii ay soo gabagabeysay muddadii ay ka shaqeynaysay dalka.

Kulanka sagootinta oo ka dhacay Madaxtooyada Qaranka ee Villa Soomaaliya, ayaa Madaxweynaha wuxuu ku ammaanay Safiir Di Mauro doorkii ay ka qaadatay xoojinta xiriirka iyo iskaashiga u dhexeeya Soomaaliya iyo Midowga Yurub, gaar ahaan dhinacyada amniga, dowlad-dhiska, horumarinta dhaqaalaha, taageerada hay’adaha dowladda iyo arrimaha bani’aadannimada.

Safiir Francesca Di Mauro ayaa si rasmi ah xilka Safiirka Midowga Yurub ee Soomaaliya u bilowday 3-dii September 2025, kaddib markii ay waraaqaha aqoonsiga danjirenimo ku wareejisay Madaxweyne Xasan Sheekh Maxamuud.

Markii xilka loo magacaabay, Midowga Yurub ayaa sheegay in mudnaanta shaqadeeda ay noqon doonto sii xoojinta wada-shaqeynta iyo iskaashiga istiraatiijiga ah ee u dhexeeya Soomaaliya iyo Midowga Yurub.

Bixitaanka Safiir Di Mauro ayaa yimid kaddib markii loo magacaabay xil cusub oo sare oo ka tirsan Adeegga Arrimaha Dibadda ee Midowga Yurub (EEAS), gaar ahaan waaxda qaabilsan arrimaha Afrika ee xarunta ururka ee Brussels.

Intii ay xilka haysay, Safiir Di Mauro waxay si dhow ula shaqeysay Dowladda Federaalka Soomaaliya iyo hay’adaha kala duwan ee dalka, iyadoo Midowga Yurub uu ka mid ahaa saaxiibbada ugu waaweyn ee Soomaaliya ka taageera dib-u-dhiska hay’adaha, amniga, dimuqraadiyeynta, xasilinta iyo horumarinta bulshada.

Sagootinta Safiirka ayaa ku soo beegmaysa xilli xiriirka Soomaaliya iyo Midowga Yurub uu ku dhisan yahay iskaashi dhinacyo badan leh oo diiradda saaraya nabadda, amniga iyo horumarka dalka.