Muqdisho, Maarso 19 (Dawan) – Saddex wasiir oo ka tirsan Dowladda Federaalka Soomaaliya kana soo jeeda Koonfur Galbeed ayaa ku dhawaaqay is-casilaad, iyagoo ku eedeeyay dowladda federaalka faragelin siyaasadeed iyo ku xadgudubka dastuurka, xilli ay sii kordhayaan xiisadaha u dhaxeeya dowladda dhexe iyo maamulka Koonfur Galbeed.
Masuuliyiinta is-casilay ayaa kala ah Maxamed Aadan Maxamed, Wasiir Ku-xigeenka Wasaaradda Qorsheynta, Maalgashiga iyo Horumarinta Dhaqaalaha; Isaak Maxamuud Mursal, Wasiir Ku-xigeenka Wasaaradda Arrimaha Dibadda iyo Iskaashiga Caalamiga; iyo Axmed Maxamed Mashruuc, Wasiiru Dowlaha Wasaaradda Qorsheynta.
War-saxaafadeedyo iyo qoraallo ay si gooni-gooni ah u soo saareen ayay ku sheegeen in go’aankooda uu salka ku hayo walaac ay ka qabaan faragelin joogto ah oo ay sheegeen in dowladda federaalka ku hayso dowlad goboleedyada, gaar ahaan Koonfur Galbeed, iyo sidoo kale ku xadgudubka dastuurka kumeelgaarka ah.
Waxay tilmaameen in tallaabooyinkaasi ay wiiqayaan dowladnimada, midnimada dalka iyo dadaallada lagu xoojinayo xasilloonida, isla markaana ay abuureen khilaaf siyaasadeed oo sii xoogeysanaya.