Muqdisho (Dawan ) – Shaqaalaha rayidka ee dowladda Soomaaliya ayaa heli doona qiimo-dhimis gaaraysa 50% adeegyada caafimaadka ee Hodan Hospital, kadib heshiis rasmi ah oo ay la saxiixdeen Guddiga Qaranka Shaqaalaha Rayidka Dowladda, iyadoo tirada shaqaalaha rayidka lagu qiyaasayo ku dhowaad 15,000 oo qof.
Heshiiskan oo Axaddii lagu saxiixay magaalada Muqdisho ayaa dhigaya in shaqaalaha rayidka ee dowladda ay si toos ah uga faa’iideysan doonaan adeegyada caafimaadka, iyadoo lagu siinayo qiimo-dhimis gaaraysa kala bar kharashaadka caafimaadka.
Agaasimaha Guud ee Hodan Hospital, Dr. Mohamed Isxaaq Cumar, ayaa sheegay in heshiiskan uu xoojinayo doorka isbitaalka ee bixinta adeegyo casri ah oo la jaanqaadaya baahida bulshada, gaar ahaan shaqaalaha dowladda oo laf-dhabar u ah howlaha maamulka.
