Kismaayo 18 December 2025 (Dawan)-Madaxweynihii hore ee Soomaaliya xilligii KMG-ga, Shariif Sheekh Axmed, ayaa weerar afka ah ku qaaday madaxda dalka hannaanka ay ku hagayan dowladnimada, isaga oo ku eedeeyay in wax-ka-beddelka dastuurka loo adeegsaday dano siyaasadeed oo cid gaar ah lagu sii joogeeyo xukunka.
Isaga oo ka hadlayay shirka mucaaradka ee ay martigelineyso magaalada Kismaayo, Shariif Sheekh Axmed ayaa sheegay in dowladnimo dhab ah ay ku dhisan tahay dastuur lagu heshiiyay iyo qaran aragtiwadaag ah, balse waxa uu ku dooday in waxa maanta socda ay yihiin isku day lagu “qalloocinayo” hannaankii sharciga ahaa ee ay dowladnimadu ku dhisneed.
“Sababta loo beddelay dastuurka, waa in la abuuro hannaan gacan-maroojin ah oo aan xalaal ahayn, si xukunka loogu sii nagaado,” ayuu yiri Shariif Sheekh Axmed, isaga oo tilmaamay in aan la aqbali karin arrintaas.
