Shariif iyo Saacid oo ka wadahadlay kala-guurka siyaasadeed ee Soomaaliya

Muqdisho (Dawan)- Madaxweynihii hore ee Soomaaliya Shariif Sheekh Axmed iyo Ra’iisul Wasaarihii hore Cabdi Faarax Shirdoon Saacid ayaa Muqdisho kaga wada hadlay waxa ay ku tilmaameen kala-guurka siyaasadeed ee dalka, sida lagu sheegay warar ay baahiyeen Shirdoon iyo Xisbiga Himilo Qaran.

Shariif wuxuu hoggaamiyaa Xisbiga Himilo Qaran, halka Shirdoon uu hoggaamiyo isbahaysiga Haybad Qaran iyo Xaqsoor. Labada dhinac waxay ka tirsan yihiin mucaaradka siyaasadeed ee Soomaaliya.

Himilo Qaran ayaa sheegtay in kulanka habeenkii Khamiista diiradda lagu saaray geeddi-socodka dowlad-dhiska, marxaladda siyaasadeed iyo sidii xal wadajir ah loogu heli lahaa caqabadaha siyaasadeed iyo amni ee dalka.

Shirdoon ayaa qoraal uu ku daabacay bartiisa Facebook ku sheegay inuu sidoo kale booqday Ra’iisul Wasaareyaashii hore Xasan Cali Khayre iyo Maxamed Xuseen Rooble, kuwaas oo ay ka wada hadleen xaaladda guud ee Soomaaliya. Waxa uu sheegay in wadahadalladu ay si gaar ah ugu saabsanaayeen ilaalinta midnimada bulshada, xoojinta wadatashiga iyo sidii loo gaari lahaa is-afgarad siyaasadeed.

Kulamadan ayaa dhacaya iyadoo dowladda federaalku rabto in doorashooyinka dalka lagu qabto hannaan qof iyo cod ah, halka qaar ka mid ah hoggaamiyeyaasha mucaaradka iyo dowlad-goboleedyadu ay dalbanayaan in hannaanka doorashada lagu saleeyo heshiis siyaasadeed oo loo dhan yahay.

Khilaafka siyaasadeed ayaa sidoo kale ku saabsan isbeddellada dastuurka, awood-qaybsiga iyo habka lagu maamulayo doorashooyinka soo socda.