Muqdisho (Dawan)— Madaxweynihii hore ee Soomaaliya Shariif Sheekh Axmed ayaa Jimcihii sheegay in la dhaqaajin waayay wadahadalladii u dhexeeyay dowladda federaalka iyo mucaaradka, isagoo mas’uuliyadda dusha ka saaray madaxda dowladda.
“Wadahadalkii waa la dhaqaajin waayay, waxaana loo dhaqaajin waayay maba danaynayaan nimanka meesha jooga,” ayuu Shariif yiri.
Shariif, oo hoggaamiya xisbiga mucaaradka ah ee Himilo Qaran, ayaa hadalkan ka jeediyay xiritaanka shir laba maalmood socday oo xisbigu Muqdisho ku yeeshay 17-kii iyo 18-kii Sebtembar.
Waxa uu sheegay in dhinaca mucaaradku sameeyay tanaasulaad dhowr ah, balse dowladda ay diidday, isaga oo ku eedeeyay madaxda dalka inay mudnaanta siinayaan sii joogitaanka awoodda halkii ay ka raadin lahaayeen xal siyaasadeed.
