Hargeysa (Dawan) – Ciidamada Booliska Somaliland ayaa xiray Sheekh Maxamed Sheekh Cabdiraxmaan Kaariye, oo ka mid ah culimada si weyn looga yaqaan deegaannada Somaliland, kaddib markii Israa’iil ku dhawaaqday aqoonsiga Somaliland, sida ay sheegeen ilo xog-ogaal ah.
Xariga sheekha, oo dhacay 26-ka bishan Diseembar, ayaa yimid ka hor inta uusan si fagaare ah uga hadlin go’aanka Israa’iil, iyadoo warar soo baxaya ay tilmaamayaan in ay jireen cabsi la xiriirta in uu si adag uga hor yimaado mowqifka maamulka Hargeysa, isla markaana uu bulshada ku boorriyo diidmo ka dhan ah aqoonsigaas.
Sheekh Maxamed Kaariye ayaa horey u dhaliilay heshiisyada Abraham ee Israa’iil ay xiriirka diblomaasiyadeed kula sameysay dalal Carbeed, isaga oo ku tilmaamay in ku biirista dal Muslim ah ay tahay arrin aan sharciyad diini ah lahayn. Waxa uu marar kala duwan muujiyay in uusan ka aamusi doonin arrimaha la xiriira Israa’iil, gaar ahaan haddii Somaliland lagu daro heshiisyadaas.
