Muqdisho (Dawan) – Dowladda Shiinaha iyo Soomaaliya ayaa kala saxiixday heshiis gargaar bani'aadannimo oo qiimihiisu yahay 15 milyan oo Yuan-ka Shiinaha ah (qiyaastii $2.1 milyan) si loogu taageero bulshada nugul ee ay saameeyeen xaaladaha bani'aadannimo, sida ay sheegtay Hay'adda Maareynta Musiibooyinka Qaranka (SoDMA) maanta oo Talaado ah.
Sida lagu sheegay qoraal ka soo baxay SoDMA, heshiiska waxaa kala saxiixday Guddoomiyaha Hay'adda, Maxamuud Macallin Cabdulle, iyo Safiirka Shiinaha ee Soomaaliya, Wang Yu.
SoDMA ayaa sheegtay in mashruuca, oo ay maalgelinayso Dowladda Shiinaha, lagu gaarsiin doono gargaar dadka ku nool deegaannada ugu baahida badan dalka, si loo xoojiyo dadaallada gurmadka iyo taageerada bulshada nugul.
