Muqdisho (Dawan)– Dowladda Shiinaha ayaa deeqo waxbarasho oo heerka mastarka ah siisay 21 shaqaale oo ka tirsan Wasaaradda Kalluumeysiga iyo Dhaqaalaha Buluugga ah ee Soomaaliya, sida ay wasaaraddu sheegtay Isniintii, iyadoo labada dal ay sii xoojinayaan iskaashiga dhinacyada kalluumeysiga iyo dhaqaalaha buluugga ah.
Shaqaalaha deeqaha helay ayaa wax ka baran doona jaamacado kala duwan oo ku yaalla Shiinaha, iyagoo ku takhasusi doona culuumta kalluumeysiga, kheyraadka badda iyo dhaqaalaha buluugga ah, ka hor inta aysan dib ugu soo laaban Soomaaliya si ay uga shaqeeyaan hay'adaha dowladda.
Wasiirka Kalluumeysiga iyo Dhaqaalaha Buluugga ah, Axmed Xasan Aadan, ayaa sheegay in barnaamijkan loogu talagalay kor u qaadista xirfadaha farsamo ee shaqaalaha wasaaradda iyo diyaarinta khubaro gacan ka geysta horumarinta warshadaha kalluumeysiga Soomaaliya.
“Waa sanadkii labaad oo xiriir ah oo aan arday heerka mastarka ah u dirayno barnaamijkan,” ayuu yiri wasiirku intii lagu guda jiray munaasabad sagootin ah oo ka dhacday Muqdisho. Waxa uu intaas ku daray in wasaaraddu hore u taageertay ku dhowaad 20 arday oo mastar ah iyo ku dhowaad 20 arday oo heerka doctorate-ka ah, iyadoo 27 ka mid ah ay hore u soo dhammeysteen waxbarashadooda.
Wasiirka ayaa ku boorriyay shaqaalaha deeqaha helay inay si buuxda uga faa'iideystaan fursaddan, islamarkaana ay dalka dib ugu soo laabtaan iyagoo wata aqoon iyo khibrad ka qayb qaadata maaraynta kheyraadka badda iyo horumarinta dhaqaalaha buluugga ah ee Soomaaliya.