Muqdisho (Dawan)– Shiinaha ayaa hirgelinaya siyaasad canshuur-dhaaf ah oo dhinac keliya ah oo loogu talagalay Soomaaliya si loo taageero dhoofinta badeecadaha Soomaalida ee la geeyo suuqa Shiinaha, sida uu sheegay Danjiraha Shiinaha u fadhiya Soomaaliya Wang Yu.
Isagoo ka hadlayay furitaankii Xarunta Qurba-joogta Soomaaliyeed ee Muqdisho maalintii Isniinta, Wang wuxuu sheegay in siyaasaddan ay qayb ka tahay dadaallada ballaaran ee lagu qoto-dheeraynayo iskaashiga dhaqaale ee ka dhexeeya Shiinaha iyo Soomaaliya.
"Si loo xoojiyo iskaashiga dhaqaalaha, Shiinaha wuxuu Soomaaliya ka hirgelinayaa siyaasad canshuur-dhaaf ah oo dhinac keliya ah, isagoo dardargelinaya dhoofinta badeecadaha Soomaaliyeed ee tayada sarreeya ee galeya suuqa gudaha ee Shiinaha," ayuu yiri Wang.
Wuxuu sheegay in dhowaan la kala saxiixan doono hab-maamuus u dhexeeya labada dal, balse ma uusan bixin faahfaahin ku saabsan badeecadaha la filayo inay ka faa'iideystaan siyaasaddan ama jadwalka rasmiga ah ee fulinta.
Wang ayaa xusay in siyaasaddan canshuur-dhaafka ah ay ka mid tahay dhowr hindise oo ka tarjumaya waxa uu ku tilmaamay qoto-dheereynta kalsoonida siyaasadeed iyo ballaarinta iskaashiga wax ku oolka ah ee ka dhexeeya labada dal.
