Shirka Afrika iyo Talyaaniga oo ka furmay Addis Ababa

Addis Ababa (Dawan ) – Shirka labaad ee Afrika iyo Talyaaniga ayaa si rasmi ah uga furmay magaalada Addis Ababa, iyadoo diiradda lagu saarayo xoojinta iskaashiga siyaasadeed iyo kan dhaqaale ee u dhexeeya Talyaaniga iyo dalalka Afrika, gaar ahaan dhinacyada istiraatiijiga ah ee mudnaanta leh.

Shirkan, oo ah kii ugu horreeyay ee noociisa ah ee lagu qabto qaaradda Afrika, ayaa isu keenay madaxda dowladaha iyo xukuumadaha si loo horumariyo iskaashi waara oo hoos yimaada Qorshaha Hindisaha Mattei ee Iskaashiga Afrika, kaas oo dowladda Talyaanigu daahfurtay sannadkii 2024.

Ajendaha shirka ayaa diiradda saaraya ganacsiga, maalgashiga, tamarta, kaabayaasha dhaqaalaha, beeraha iyo hal-abuurka, iyadoo ujeeddadu tahay in la xoojiyo iskaashi wax-ku-ool ah oo dan u ah labada dhinac.

Madaxweynaha Soomaaliya, oo ku sugan Addis Ababa, ayaa ka mid ah madaxda Afrika ee ka qeyb galaya shirka, waxaana la filayaa inuu kulammo la yeesho madaxda Talyaaniga iyo hoggaamiyeyaasha kale ee ka soo qeyb galay.

Ra’iisul Wasaaraha Talyaaniga, Giorgia Meloni, ayaa sidoo kale ka qeyb galaysa shirka, kaas oo la filayo inuu sii xoojiyo xiriirka dhaqaale iyo istiraatiiji ee u dhexeeya Talyaaniga iyo dalalka Afrika.

Qoraal uu Ra’iisul Wasaaraha Itoobiya ku daabacay bartiisa facebook ayuu ku sheegay in martigelinta Addis Ababa ee shirkan ay mar kale muujinayso diyaar-garowga Itoobiya ee ah inay la shaqeyso Talyaaniga, dalalka Afrika iyo dhammaan saaxiibbada doonaya in doodaha istiraatiijiga ah loo beddelo natiijooyin horumarineed oo la taaban karo, kuwaas oo wax ka beddela nolosha dadka. “Markan ku martigelino shirka magaalada Addis Ababa, waxaan mar kale adkeynaynaa diyaar-garowgeenna ah inaan la shaqeyno Talyaaniga, walaalaheenna Afrika iyo dhammaan saaxiibbada ka go’an in doodaha istiraatiijiga ah loo beddelo natiijooyin horumarineed oo la taaban karo,” ayuu yiri Abiy Ahmed.

Shirkan ayaa loo arkaa mid muhiim u ah xoojinta iskaashiga istiraatiijiga ah ee u dhexeeya Afrika iyo Talyaaniga, isla markaana kor u qaadaya maalgashiga, horumarinta dhaqaalaha iyo wada-shaqeynta waarta ee labada dhinac.