Muqdisho (Dawan) – Qaar ka mid ah shirkadaha caymiska ee ka shaqeeya Soomaaliya, oo ay ka mid yihiin Baraka Insurance, Somali Takaful Insurance, Salmastar Insurance, iyo First Somalia Takaful Insurance, ayaa ku dhawaaqay mashruuc gargaar lacageed oo dhan $4.5 milyan, kaasoo loogu talagalay in lagu taageero xoolo-dhaqatada ay abaartu saameysay.
Mashruucan, oo ay iska kaashanayaan shirkadaha caymiska iyo Dowladda Federaalka Soomaaliya, ayaa si gaar ah u gaaraya qoysas ku nool ku dhowaad 20 degmo oo ka tirsan gobollo kala duwan oo dalka ah, kuwaas oo abaartu si weyn u saameysay nolol-maalmeedkooda. Tirada dadka ka faa’iideysanaya barnaamijkan ayaa la sheegay inay ka badan tahay 10,000 qof, halka 1,200 qoys ay si toos ah uga helayaan taageerada.
Munaasabadda daahfurka mashruuca waxaa ka qeyb galay xubno ka tirsan Golaha Wasiirrada Xukuumadda Federaalka Soomaaliya, xildhibaanno, ganacsato, wakiillo ka socday World Bank, iyo xubno ka tirsan bulshada rayidka.
Mas’uuliyiinta shirkadaha caymiska ayaa sheegay in barnaamijku yahay mid loogu talagalay in lagu yareeyo dhibaatooyinka abaarta ee saameeya xoolo-dhaqatada, isla markaana uu ka mid yahay nidaamka Somali Takaful, oo ah caymis ku shaqeeya mabda’a shareecada Islaamka.
