Muqdisho (Dawan)— Hay’adaha Hayaan Heritage, Biciid iyo Green Media Initiative ayaa ka digay khatarta ay xaaladaha cimilada ee la xiriira El Niño ku hayaan dhaxalka taariikhiga ah, dhaqameed iyo deegaan ee Soomaaliya, iyagoo ku baaqay in la qaado tallaabooyin looga hortagayo waxyeellada ka dhalan karta roobabka xooggan, daadadka iyo fatahaadaha.
Bayaan wadajir ah oo ay soo saareen hay’adahan ayaa lagu sheegay in isbeddelka cimiladu uu halis ku yahay dhaxalka ummadda Soomaaliyeed, gaar ahaan xilli la saadaalinayo xaalado cimilo oo saameyn kara qaybo ka mid ah gobolka.
Hay’adaha ayaa sheegay in daadadka, fatahaadaha, roobabka iyo carro-guurka ka dhalan kara xaaladahaas aysan khatar ku ahayn oo keliya dadka iyo duunyada, balse ay sidoo kale waxyeello u geysan karaan dhismayaasha qadiimiga ah, goobaha taariikhiga ah, agabka dhaqameed iyo kutubta farguriga ah ee dhifka ah. Waxay tilmaameen in goobaha iyo agabkaasi ay xambaarsan yihiin qiime taariikheed iyo mid dhaqameed oo muhiim u ah bulshada Soomaaliyeed, sidaas darteedna ay lagama maarmaan tahay in laga hortago waxyeellada ay xaaladaha cimiladu u geysan karaan.
