TEL AVIV (Dawan) – Madaxweynaha Somaliland, Cabdiraxmaan Maxamed Cabdillaahi (Cirro), ayaa sheegay in xukuumaddiisu mudnaanta koowaad siinayso horumarinta adeegyada biyaha, isaga oo xusay in wada-hadallada ay la leeyihiin Israa’iil ay diiradda saarayaan sidii bulshada Somaliland loo gaarsiin lahaa biyo nadiif ah.
cirro oo booqasho rasmi ah ku jooga Israa’iil, ayaa sheegay in Somalilnd qorshaynayso in saddexda sano ee soo socota si weyn loo ballaariyo helitaanka biyaha, si muwaadiniinta Somaliland ay u helaan adeeg biyo oo ku filan.
“Waxaan ku dadaali doonnaa in saddexda sano ee soo socota qof kasta oo muwaadin Somaliland ahi helo biyo. Taasi waa mudnaanta ugu sarreysa ee aan siinayno adeegyada bulshada,” ayuu yiri Madaxweynaha Somaliland.
Hadalka Cirro ayaa imanaya xilli qaybo badan oo Somaliland ka mid ahi ay weli wajahayaan caqabado la xiriira helitaanka biyo nadiif ah, iyadoo kororka dadka iyo baahida adeegyada aasaasiga ahi ay sii kordhinayaan culayska ka jira qaybta biyaha.
Cirro ayaa arrintan kaga hadlay kulan uu la yeeshay masuuliyiinta sare ee Hay’adda Iskaashiga Caalamiga ah ee Israa’iil (MASHAV), oo ka shaqaysa taageerada mashaariicda horumarinta iyo kobcinta aqoonta farsamada ee dalalka kala duwan.