Soomaaliya (Dawan)– Kororka isticmaalka taleefannada casriga ah iyo baraha bulshada ayaa dunida ka abuuray dood ku saabsan saameynta ay ku yeelan karaan xiriirrada bulshada, guurka iyo heerarka dhalmada. Inkastoo arrintan lagu sameeyay daraasado kala duwan, haddana su'aasha taagan ayaa ah sida ay xaaladdu u saameysay Soomaaliya.
Dhalinyaro badan oo Soomaaliyeed ayaa maanta saacado badan ku qaata baraha bulshada sida TikTok, Facebook, Instagram iyo Snapchat. Taas ayaa dhalisay su'aalo ku saabsan in aaladahani ay fududeeyeen xiriirka bulshada ama ay adkeeyeen dhismaha xiriirrada dhabta ah.
Sanadkii 2007, markii shirkadda Apple ay soo saartay iPhone-kii ugu horreeyay, cilmi-baarayaal badan ayaa bilaabay inay dareemaan hoos u dhac ku yimid heerarka dhalmada dalal kala duwan oo caalamka ah.
Qaar ka mid ah daraasadaha ayaa tilmaamaya in isbeddelkaasi aanu la xiriirin saameyn caafimaad ama shucaac, balse uu ka dhashay sida taleefannada casriga ahi u beddeleen habka ay dadku isku bartaan, u wada xiriiraan, una dhisaan xiriirrada jacaylka iyo qoyska.
Soomaaliya ayaa iyaduna ku jirta marxalad uu si xawli ah u kordhayo isticmaalka internet-ka iyo baraha bulshada. Dhaqan ahaan, Soomaalidu waxay ahayd bulsho xiriirkeedu ku dhisnaa kulamo fool-ka-fool ah, iyadoo dhalinyaradu ay isku baran jireen xaafadaha, iskuullada, jaamacadaha iyo munaasabadaha bulshada.
Maanta se, xiriirro badan ayaa ka bilowda internet-ka, halka saacado badan lagu qaato daawashada muuqaallada gaagaaban, doodaha iyo waxyaabaha lagu wadaago baraha bulshada. Dad badan ayaa sidoo kale sheegaya inay ku adag tahay inay dhisaan xiriirro dhab ah, inkastoo ay boqolaal qof kula xiriiraan internet-ka.
Khubarada qaarkood ayaa aaminsan in isbarbardhigga joogtada ah ee nolosha dadka kale lagu arko baraha bulshada uu qofka ku abuuri karo dareen ah inuusan weli diyaar u ahayn tallaabooyinka waaweyn ee nolosha, sida guurka ama dhismaha qoys.