Muqdisho (Dawan) – Xafiiska Beeraha ee Dowlad Deegaanka Soomaalida ayaa bilaabay qorshe ballaaran oo lagu beeri doono 9,625 hektar oo dhul ah, si loo yareeyo ku tiirsanaanta caawimada cuntada ee dibadda, sida ay Talaadadii shaacisay wasaaradda beeraha ee deegaanka.
Mashruucan, oo laga fulin doono degmooyinka Harooreys iyo Tuulli-guuleed, ayaa lagu bartilmaameedsanayaa in lagu soo saaro 300,000 oo kintal oo raashin ah, taasoo gacan ka geysan doonta in gobolka uu ka baxo ku tiirsanaanta deeqaha caalamiga ah. Waxaa loo adeegsan doonaa abuur casri ah oo loo yaqaan Hybrid PHB 546, kaas oo laga keenay shirkadda Ethiopian Seed Enterprise.
Axmed Cabdullaahi Xabiib, madaxa xafiiska beeraha ee degmada Harooreys, ayaa sheegay in qorshahan uu yahay mid istaraatiiji ah oo muhiim u ah yaraynta ku tiirsanaanta caawimada dibadda. Waxa uu intaas ku daray in la qorsheynayo in la beero in ka badan 36,300 hektar xilliga roobaadka Gu’ga, iyo 73,000 hektar xilliga roobaadka Karan.
