Sidee Soomaaliya uga falcelisay qorshaha Somaliland ee safaaradda Qudus?

Muqdisho (Dawan)- Soomaaliya ayaa si adag uga hortimid qorshaha Somaliland ay ku doonayso inay safaarad uga furato magaalada Qudus, iyadoo ku tilmaantay tallaabadaasi mid sharci darro ah.

“Dowladda Federaalka Soomaaliya waxay si kulul u cambaareyneysaa tallaabada maamulka waqooyi-galbeed ee Soomaaliya uu ku furayo waxa uu ugi yeeray ‘safaarad’ magaalada Qudus,” ayaa lagu yiri war-saxaafadeed kasoo baxay Wasaaradda Arrimaha Dibadda.

Wasaaradda ayaa sidoo kale carrabka ku adkeysay sida ay uga go’an tahay ilaalinta midnimada, madaxbannaanida iyo wadajirka dhuleed ee dalka, iyadoo diidday tallaabo kasta oo hal dhinac ah oo wax u dhimaysa xaaladda sharci iyo siyaasadeed ee Soomaaliya.

War-saxaafadeedka ayaa lagu sheegay in qorshahaasi uu ka hor imanayo sharciga caalamiga ah iyo go’aannada ururrada gobolka iyo kuwa caalamiga ah ee quseeya arrimaha Soomaaliya.

Wasaaradda ayaa tilmaantay in tallaabadaasi ay tahay mid xiisad ka abuureysa dunida Carabta iyo tan Islaamka, maadaama magaalada Qudus ay leedahay xaalad siyaasadeed iyo mid diimeed oo gaar ah.

Dowladda Soomaaliya ayaa ugu baaqday beesha caalamka inay ixtiraamto madax-bannaanida iyo qaranimada Soomaaliya, isla markaana aysan aqbalin tallaabooyin ay sheegtay inay dhaawacayaan midnimada dalka.

Tallaabadan ayaa timid kaddib markii Somaliland ay sheegtay inay safaarad ka furaneyso magaalada Qudus, halka Israa’iilna lagu wado inay xafiis diblomaasiyadeed ka furato Hargeysa. Sida ay sheegtay Reuters, wakiilka Somaliland u jooga Israa’iil, Maxamed Xaaji, ayaa sheegay in Somaliland ay dhawaan safaarad ka furan doonto Qudus, kaddib markii Israa’iil ay ku dhawaaqday inay aqoonsatay Somaliland dhammaadkii sanadkii 2025.

Muqdisho ayaa horay u diidday aqoonsiga Israa’iil ee Somaliland, iyadoo ku tilmaantay tallaabo ka dhan ah madax-bannaanida iyo wadajirka dhuleed ee Soomaaliya. Somaliland ayaa ku dhawaaqday inay ka go’day Soomaaliya sanadkii 1991, balse weli ma helin aqoonsi ballaaran oo caalami ah, halka Dowladda Federaalka Soomaaliya ay ku adkeysaneyso in Somaliland ay tahay qayb ka mid ah Soomaaliya.

Arrintan ayaa sidoo kale dhalisay falcelin heer gobol iyo mid Carbeed. Ururka Jaamacadda Carabta ayaa ka digay waxa uu ku tilmaamay “cawaaqib halis ah” oo ka dhalan kara saameynta Israa’iil ee Geeska Afrika, isagoo sheegay in tallaabada Somaliland ay tahay mid sharci darro ah oo xadgudub ku ah madax-bannaanida Soomaaliya.

Somaliland ayaa muddo dheer raadineysay aqoonsi caalami ah, iyadoo ku doodaysa inay leedahay maamul, doorashooyin iyo hay’ado u gaar ah. Hase yeeshee, Soomaaliya, Midowga Afrika, Jaamacadda Carabta iyo inta badan beesha caalamka ayaa weli Somaliland u arka qayb ka mid ah Jamhuuriyadda Federaalka Soomaaliya.