Muqdisho (Dawan)- Soomaaliya ayaa xoojinaysa tallaabooyinka digniinta hore iyo qorshayaasha daadgureynta iyadoo loo sii diyaar garoobayo roobab culus iyo fatahaado ka dhalan kara El Niño. Hay’adda Maareynta Musiibooyinka Soomaaliya waxay sheegtay inay diyaarisay goobo dadka loo daadgureyn karo iyo sahayda gurmadka.
Guddoomiyaha Hay’adda Maareynta Musiibooyinka, Maxamuud Macallin Cabdulle, ayaa sheegay in SoDMA ay kooxo u dirtay dhammaan degmooyinka dalka si ay uga shaqeeyaan wacyigelinta iyo diyaar-garowga bulshada.
“Dadku runtii waa dad wax is gaarsiiya waaye , warbixintana is gaarsiin kara,” ayuu Maxamuud Macallin ku yiri wareysi uu siiyay barnaamijka Miizaan ee Dawan Media. Waxa uu sheegay in SoDMA ay leedahay kooxo ka howlgala degmooyinka dalka, kuwaas oo gaarsiiya bulshada macluumaadka ku saabsan xaaladda iyo khataraha soo socda.
Wuxuu sheegay in hay’addu meelaha ay gaari karto ay shaqaale u dirtay, isaga laftiisuna uu booqday qaar ka mid ah deegaannada, halka shaqaalaha SoDMA ay gaareen goobo kale.
“Inta dowladdu gacanteeda gaari karto, dad baan u dirnay. Aniguna qaar waan tagay, Baydhabo anigaa tagay oo shaqo ka soo qabtay, Baledaweyne anigaa tagay ,shaqona waan ka soo qabtay, bulshada waan la kulmay,” ayuu yiri.
SoDMA waxay sidoo kale adeegsanaysaa warbaahinta si ay farriimaha u gaarsiiso bulshada, iyadoo Maxamuud Macallin uu sheegay in Dawan Media ay ka mid tahay warbaahinta ka qayb qaadatay faafinta macluumaadka ku saabsan diyaar-garowga.
Hay’addu waxay sidoo kale la shaqeysay culimada, kuwaas oo qaar lagu casuumay xarumaha iyo goobaha ay hawshu ka socoto, halka kuwo kalena farriimaha lagu gaarsiiyay masaajidda, iyadoo loo marayo Wasaaradda Awqaafta iyo Arrimaha Diinta.
