Jeddeh (Dawan)- Ururka Iskaashiga Islaamka (OIC) ayaa si adag uga falceliyay go'aanka ay Israa’iil qaadatay ee ah inay safiir u magacaawdo Somaliland, taas oo ay ku tilmaamtay xadgudub cad oo ka dhan ah madaxbannaanida iyo midnimada dhuleed ee Jamhuuriyadda Federaalka Soomaaliya.
Ururka ayaa sheegay in tallaabadaasi ay ka hor imanayso mabaadi’da aasaasiga ah ee sharciga caalamiga ah, gaar ahaan kuwa adkaynaya ixtiraamka madaxbannaanida dalalka xubnaha ka ah Qaramada Midoobay iyo ilaalinta dhammaystirka dhulkooda.
Ururuku waxa uu mar kale xaqiijiyay garab istaagga buuxa ee Soomaaliya, iyo taageerada joogtada ah ee ay u hayo midnimadeeda qaran iyo hay’adaha sharciyeysan ee dalka. Sidoo kale, waxay ku celisay muhiimadda ay leedahay in si buuxda loo ixtiraamo Axdiga Qaramada Midoobay iyo xeerarka caalamiga ah ee dhigaya ilaalinta madax-bannaanida iyo xuduudaha dalalka.
