Muqdisho (Dawan) - Maamulka Muqdisho ayaa raadinaya xal waara oo lagu yareeyo fatahaadaha soo noqnoqda kahor roobabka la filayo ee El Niño, kaddib markii mas’uuliyiintu ay sheegeen in dhismayaal iyo biyo xannibaado laga sameeyay marinnadii dabiiciga ahaa ay hor istaagayaan qulqulka biyaha.
Arrintan ayaa Sabtidii looga hadlay kulan ay yeesheen Guddiga Sare ee Maamulka Sanduuqa Qaranka ee Maareynta Khatarta Musiibooyinka, kaas oo lagu qabtay xarunta Hay’adda Maareynta Musiibooyinka Qaranka ee SoDMA. Kulanka waxaa guddoomiyay Wasiirka Arrimaha Gudaha, Federaalka iyo Dib-u-heshiisiinta, Cali Yuusuf Cali Xoosh, waxaana ka qaybgalay mas’uuliyiin sare oo dowladda ka tirsan, Maamulka Gobolka Banaadir, culimo, ururrada bulshada rayidka ah iyo ganacsato.
Kulanka ayaa lagu qiimeeyay jawaabtii laga bixiyay roobabkii xoogga lahaa ee dhowaan ka da’ay Muqdisho, qorshaha dib loogu furayo marinnada biyaha iyo tallaabooyinka lagu xoojinayo sanduuqa qaranka ee maareynta musiibooyinka.
Wasiirka Deegaanka iyo Isbeddelka Cimilada, Bashiir Maxamed Jaamac, ayaa sheegay in biyo xannibaado laga sameeyay waddada u dhexeysa garoonka diyaaradaha Muqdisho iyo Safaaradda Turkiga ay hor istaagayaan marinkii ay biyuhu hore u mari jireen. Wuxuu sheegay in laba qof ay ku dhinteen fatahaad hore oo aaggaas ka dhacday, isaga oo ka digay in xirnaanshaha marinka biyuhu uu go’doomin karo ku dhowaad 40 guri, dadka degganna u horseedi karo khataraha fatahaadda iyo koronto-qabsiga.
Jaamac ayaa ku baaqay in dhagxaanta iyo xannibaadaha kale ee hor taagan marinka biyaha laga qaado ama dib loo habeeyo, si biyuhu si ammaan ah ugu gudbaan iyaga oo aan waxyeello u geysan dhismayaasha ku dhow.
