Qudus (Dawan) – Dhaqdhaqaaqa Xamaas ayaa si kulul uga falceliyay qorshaha ay Somaliland ku dooneyso inay safaarad ka furato magaalada Qudus, iyadoo tallaabadaas ku tilmaantay “khalad siyaasadeed” iyo mid ka hor imanaysa xeerarka iyo qawaaniinta caalamiga ah.
Bayaan ay Axaddii soo saartay Xamaas ayay ku cambaareysay booqashada Madaxweynaha Somaliland, Cabdiraxmaan Maxamed Cabdillaahi (Cirro), uu ku tagay Israa’iil, halkaas oo la sheegay inuu qorsheynayo furitaanka safaarad uu maamulka Somaliland ku yeesho magaalada Qudus.
Xamaas ayaa sheegtay inay si adag u diiddan tahay booqashadaas iyo kulamada uu Madaxweynaha Somaliland la yeeshay madaxda Israa’iil, kuwaas oo ay ku eedeysay inay mas’uul ka yihiin xadgudubyo ka dhan ah shacabka Falastiin iyo dalal kale oo Carbeed.
“Furitaanka safaarad uu maamulka Somaliland ku yeesho Qudus waa khalad siyaasadeed iyo ku xadgudub dhammaan xeerarka iyo qawaaniinta caalamiga ah, sidoo kalena waa iska indha-tiridda mowqifka mideysan ee Carabta iyo Muslimiinta ee ku aaddan magaalada Qudus,” ayay Xamaas ku sheegtay bayaankeeda.
Dhaqdhaqaaqu wuxuu tallaabadan ku tilmaamay mid khatar ah oo u baahan in dib looga laabto, isagoo ugu baaqay Jaamacadda Carabta, Ururka Iskaashiga Islaamka iyo dhinacyada kale ee ay khuseyso inay ka hortagaan tallaabo kasta oo dhaawici karta mowqifka guud ee ku saabsan qaddiyadda Falastiin.
