Türkiye (Dawan)— Iskaashi ay hoggaaminayso Jaamacadda SIMAD ee Soomaaliya ayaa tallaabo cusub u qaaday horumarinta waxbarashada tamarta la cusboonaysiin karo ee Afrika, kaddib markii in ka badan 30 aqoonyahan iyo wakiillo jaamacadeed ay Türkiye ku soo gabagabeeyeen tababar socday muddo shan maalmood ah.
Tababarka oo ka dhacay Jaamacadda Kütahya Dumlupınar intii u dhaxaysay 21-ka iyo 25-ka Sebtembar ayaa isu keenay jaamacado ka kala socda Soomaaliya, Tanzania, Malawi, Türkiye iyo Talyaaniga, iyadoo diiradda lagu saarayay sidii loo xoojin lahaa aqoonta macallimiinta, cilmi-baarista iyo fursadaha ganacsi ee la xiriira tamarta nadiifta ah.
Barnaamijkan ayaa qayb ka ah Mashruuca Renewable Energy Advancement for Inclusive Development in Sub-Saharan Africa, READ, oo ay maalgelin wadajir ah ku bixiso Midowga Yurub, iyada oo loo marayo barnaamijka Erasmus+ ee xoojinta awoodda waxbarashada sare. Isbahaysiga READ waxaa ku mideysan siddeed jaamacadood oo ka kala socda shan dal.
Soomaaliya waxaa ka qaybgalaya Jaamacadda SIMAD, Jaamacadda Muqdisho iyo Capital University, halka Tanzania ay ku jiraan Jaamacadda Dar es Salaam iyo Saint Augustine University.
Jaamacadda Malawi, Kütahya Dumlupınar University ee Türkiye iyo University of Cassino and Southern Lazio ee Talyaaniga ayaa iyaguna qayb ka ah iskaashigan.
Ujeeddadu waa in jaamacadaha Afrika laga taageero casriyeynta manhajyada tamarta la cusboonaysiin karo, kobcinta aqoonta macallimiinta iyo abuurista fursado cilmi-baaris iyo ganacsi oo la xiriira dhaqaalaha cagaaran.
Daraasad lagu sameeyay baahiyaha mashruuca ayaa muujisay in 43 boqolkiiba ka qaybgalayaashu ay yaraanta macallimiinta iyo tababarayaasha aqoonta u leh tamarta la cusboonaysiin karo ku tilmaameen caqabad weyn.
Guddoomiyaha Jaamacadda Kütahya Dumlupınar, Prof. Dr. Süleyman Kızıltoprak, ayaa sheegay in tababarku diiradda saarayo sidii wax looga qaban lahaa baahidaas.
