Muqdisho (Dawan) – Koox siyaasiyiin Soomaaliyeed ah ayaa qorsheynaya inay daahfurayaan madal siyaasadeed cusub oo lagu magacaabo "Madasha Midnimo Qaran", xilli Soomaaliya ay wajahayso muranno siyaasadeed oo la xiriira doorashooyinka, dastuurka iyo xiriirka dowladda federaalka iyo dowlad-goboleedyada.
Madashan ayaa mideynaysa siyaasiyiin sheegay inay doonayaan inay noqdaan cudud siyaasadeed oo dhexdhexaad ah, isla markaana xoogga saarta wada-hadalka, midnimada qaranka iyo dhisidda is-afgarad siyaasadeed ka hor geeddi-socodka doorashooyinka.
Ra’iisul Wasaarihii hore ee Soomaaliya, Cumar Cabdirashiid Cali Sharmaarke, ayaa sheegay in ujeeddada madashu ay tahay yareynta kala qaybsanaanta siyaasadeed iyo soo jeedinta xalal lagu wajahayo murannada ka taagan hannaanka doorashooyinka iyo marxaladda kala guurka siyaasadeed.
“Waxaan garowsannay inaan madal samayno annaga oo firqad taagan noqonno oo Midnimo Qaran la yiraahdo, kana kooban dad asal iyo aragtiyo kala duwan leh, balse u taagan Soomaaliya oo dhan,” ayuu Sharmaarke ku sheegay wareysi uu siiyay Dawan Media.
Sharmaarke ayaa sheegay in Madasha Midnimo Qaran ay diiradda saari doonto taageeridda hannaan doorasho oo lagu kalsoonaan karo, isla markaana gacan ka geysta xoojinta xasilloonida siyaasadeed iyo dib u dhiska kalsoonida u dhexeysa dhinacyada kala duwan.
