Hargeysa (Dawan) – Madaxweyne ku-xigeenka Somaliland, Maxamed Cali Aw Cabdi, ayaa daah furay Barnaamijka Daahfurka Rasmiga ah ee Hagaha Maalgashiga Somaliland, kaas oo qeexaya fursadaha maalgashi, siyaasadda maalgashiga, iyo dhiirrigelinta maalgelinta gudaha iyo dibadda.
Madaxweyne ku-xigeenka waxaa ku wehliyay Munaasabadda daahfurka Wasiirro ka tirsan Xukuumadda, ganacsato, aqoonyahanno, iyo marti kale, waxaa soo qaban qaabisay wasaaradda horumarinta maalgashiga iyo warshadaha somaliland
Madaxweyne ku-xigeenka ayaa maalgashiga ku tilmaayay midka ugu muhiimsan ee Somaliland isaga oo ku tilmaamay furaha albaabka laga soo galo Somaliland, hadal lagu dhiira galinayay maalgashiga.
“Maalgashigu waa albaabka ama furaha dalka laga soo galo. Nasiib wanaag, maanta Somaliland waxa yaalla fursado badan oo maalgashi. Waxaan ku dhiirigelinayaa ganacsatada dalka in ay ka faa’iidaystaan fursadahaas, maadaama ay yihiin muwaadiniin dalkan u dhashay. Xukuumad ahaan waxaan diyaar u nahay in aanu soo dhawayno cid kasta oo doonaysa in ay dalka maalgashato,” ayuu yiri Madaxweyne ku-xigeenka.
Wasiirka wasaaradda horumarinta maalgashiga iyo warshadaha Somaliland oo asna ka hadlaya ayaa isku xiray aqoonsiga Somaliland iyo Maalgashiga, isaga oo sheegay hadii maalgashiga uu hagaago aqoonsiga uu fududaan doono.
Barnaamijkan Hagaha Maalgashiga ayaa lagu tilmaamay mid muhiim u ah soo jiidashada maalgelinta iyo xoojinta xiriirka ganacsi ee gudaha iyo dibadda, iyadoo la rajeynayo in uu horseedo horumar dhaqaale iyo fursado shaqo oo waaweyn haka reebin dhanka aqoonsiga raja badan ayuu leeyahay.