Somaliland oo go’aan kasoo saartay munaasabadaha abaalmarinta shaqaalaha

Somaliland (Dawan) – Madaxweynaha Somaliland, Cabdiraxmaan Maxamed Cabdillaahi (Cirro), ayaa si rasmi ah u go’aamiyay in la joojiyo dhammaan xafladaha, munaasabadaha iyo barnaamijyada abaal-marinta shaqaalaha , laga bilaabo maanta (15 Febraayo 2026). Go’aankan ayaa la xiriira xaaladaha abaaraha ba’an ee ka jira deegaannada Somaliland, kuwaas oo si weyn u saameeyay nolosha iyo dhaqaalaha bulshada.

"Waxa aan qoraalkan idinkula socodsiinayaa in Madaxweynaha Jamhuuriyadda Somaliland uu si rasmi ah u go’aamiyey in la joojiyo dhammaan Xafladaha, Munaasibadaha iyo Barnaamijyada Abaal-marinta Shaqaalaha Dawladda, laga bilaabo maanta oo ay taariikhdu tahay 15-ka Feb 2026, ilaa amar dambe laga soo saaro" ayaa lagu yiri, qoraal kasoo baxay xafiiska Cirro.

Qoraalka ayaa intaas ku daray in abaaruhu ay sababeen biyo-yaraan, khasaare culus oo soo gaaray xoolaha nool, barakac, iyo culays nololeed oo ku yimid qoysas badan, gaar ahaan bulshada reer miyiga ah iyo dadka danyarta ah.

Waxaa lagu tilmaamay qoraalka in go’aankan uu qayb ka yahay mas’uuliyad qaran, iyadoo mudnaanta koowaad la siinayo xaaladaha bini’aadannimo iyo danta guud.

Waxaa loogu baaqay wasaaradaha, hay’adaha iyo wakaaladaha maamulka inay muujiyaan wadajir iyo garab istaag, si loo wajaho dhibaatada abaaraha ee ka jirta qaybo badan oo Somaliland. Sidoo kale, waxaa la caddeeyay in go’aankan uu khuseeyo dhammaan hay’adaha, iyadoo lagu amray in si degdeg ah loo fuliyo.

Go’aankan ayaa imanaya xilli ay Somaliland dardar-gelinayso gurmadka abaaraha, iyadoo la fulinayo qorshayaal lagu yareynayo saameynta xaaladda adag ee ka taagan deegaannada ay abaartu saameysay.