Davos (Dawan)- Somaliland ayaa shaacisay inay garwaaqsantahay baahida sii kordheysa ee Itoobiya u qabto helitaanka badda iyo dekedo ganacsi, iyadoo muujisay diyaar u ahaanshaha inay si wadajir ah ugala shaqeyso Addis Ababa horumarinta dekedaha iyo kaabeyaasha dhaqaale ee dan u ah labada dhinac.
Madaxweynaha Somaliland, Cabdiraxmaan Maxamed Cabdillaahi (Cirro), ayaa hadalkan ka sheegay Khamiistii kulan doceed uu ka qayb galay intii uu socday Golaha Dhaqaalaha Adduunka (World Economic Forum) ee ka dhacay magaalada Davos, halkaas oo su’aalo lagu weydiiyay arrimaha iskaashiga goboleed iyo horumarinta ganacsiga.
Cirro wuxuu sheegay in inkastoo Itoobiya muddo dheer ku tiirsanayd dekedda Jabuuti, haddana dekedda Berbera ay haatan u tahay marin kale oo istiraatiiji ah, isaga oo xusay in Somaliland ay diyaar u tahay inay kaalin muuqata ka qaadato daboolidda baahidaas. “Waxaan aqoonsanahay baahida Itoobiya u qabto helitaanka badda, dekedo ganacsi iyo marinno gaadiid,” ayuu yiri Cirro, isagoo intaa ku daray in iskaashi dhow oo labada dhinac ah uu gacan ka geysan karo horumarinta kaabeyaasha dhaqaale, kor u qaadidda ganacsiga iyo xoojinta is-dhexgalka gobolka.
