Somaliland oo ka carootay hadal uu sheegay Erdoğan

Hargeysa (Dawan) — Maamulka Somaliland ayaa si adag uga falceliyay hadalladii ugu dambeeyay ee ka soo yeeray Madaxweynaha Turkiga Recep Tayyip Erdoğan, kuwaas oo uu kaga hadlay aqoonsiga ay Israa’iil siisay Somaliland.

Erdoğan ayaa sheegay in dalalka Geeska Afrika ay u baahan yihiin inay si wadajir ah xal ugu helaan dhibaatooyinka gobolka, isla markaana aan gobolka loo rogin goob ay ku hardamaam quwadaha shisheeye.

Wuxuu si gaar ah u xusay in aqoonsiga Israa’iil ee Somaliland inuusan faa’iido u lahayn Somaliland iyo guud ahaan Geeska Afrika.

Hadalladaas ayaa si weyn uga caraysiiyay Somaliland, iyada oo sheegtay in aqoonsiga iyo xiriirrada diblomaasiyadeed ay yihiin arrimo ay go’aansadaan dowladaha iyo shacabka gobolka, isla markaana aan la aqbali karin faragelin dibadeed.

Somaliland waxay ku boorrisay Turkiga inuu ka fogaado tallaabooyin ama hadallo kicin kara xiisadaha gobolka, iyadoo ku adkaysatay in siyaasadda arrimaha dibadda ee Geeska Afrika ay ku dhisan tahay ixtiraam, faragelin la’aan, iyo go’aan qaadasho madax-bannaan. Sidoo kale, Somaliland ayaa sheegtay in xiriirrada iyo iskaashiga ay la leedahay dalalka caalamka ay muhiim u yihiin dadaalladeeda ay ku doonayso aqoonsi caalami ah.

Dhankiisa, Turkiga ayaa hore u muujiyay in uusan aqbali doonin wax kasta oo uu u arko faragelin dibadeed oo lagu kordhinayo xiisadaha Geeska Afrika, isagoo ka hor yimid aqoonsiga Israa’iil ee Somaliland.