New York (Dawan)- Wakiilka Joogtada ah ee Soomaaliya u fadhiya Qaramada Midoobay, Abuukar Daahir Cismaan Baalle, ayaa si adag u cambaareeyay tallaabada Israa’iil ku sheegtay inay ku aqoonsatay Somaliland, isagoo ku tilmaamay mid qorsheysan oo ujeedkiisu yahay in lagu mashquuliyo dareenka caalamka, lana yareeyo in fiiro gaar ah la siiyo xaaladda ka taagan dhulka Falastiin.
Hadalkan ayuu danjiruhu ka jeediyay khudbad uu xalay ka hor jeediyay Golaha Ammaanka ee Qaramada Midoobay, xilli Soomaaliya ay si rasmi ah ula wareegtay hoggaanka wareegga ah ee golaha. Abuukar Baalle ayaa sheegay in tallaabadaasi aysan ahayn mid ka go’day duruufaha jira, balse ay ka mid tahay istaraatijiyad siyaasadeed oo lagu doonayo in lagu leexiyo aragtida beesha caalamka.
“Waxaan aaminsanahay in tani ay tahay isku day si cad loogu talagalay in dunida looga jeediyo waxa xoogagga gumeysiga ay ka wadaan dhulka la gumeysanayo ee Falastiin,” ayuu yiri Danjire Baalle, isagoo intaa ku daray in fikradda lagu aqoonsanayo qayb ka mid ah dhulka Soomaaliya ay tahay “dadaal qorsheysan oo Israa’iil ku doonayso inay ku mashquuliso caalamka.”
