Shabeellaha Dhexe (Dawan) – Dowladda Federaalka Soomaaliya ayaa sheegtay in Ciidanka Xoogga Dalka Soomaaliyeed, oo kaashanaya saaxiibbada caalamiga ah, ay dileen in ka badan 30 xubnood oo ka tirsan Al-Shabaab, kadib howlgallo ka dhacay deegaanno ka tirsan gobolka Shabeellaha Dhexe.
War-saxaafadeed ay soo saartay Wasaaradda Gaashaandhigga ayaa lagu sheegay in howlgalladu ay ka dhaceen deegaannada Gayfo, Ruun Idiris iyo Cali Gaduud, halkaas oo Al-Shabaab ay ku lahaayeen fariisimo iyo goobo lagu kaydin jiray hub, rasaas iyo saanad ciidan.
Sida wasaaraddu sheegtay, howlgalka ugu horreeyay ayaa la fuliyay 24-kii Juun, waxaana lagu bartilmaameedsaday xarun ay kooxda ku lahayd deegaanka Gayfo. Maalintii xigtayna waxaa la qaaday weerarro kale oo lagu beegsaday saddex goobood oo ku yaalla Ruun Idiris iyo fariisin ku taal Cali Gaduud, oo dowladda ay sheegtay inay ahayd goob ay ku urursanaayeen maleeshiyaad qorsheynayay weerarro.
