Dubrovnik (Dawan) – Jamhuuriyadda Federaalka Soomaaliya iyo Jamhuuriyadda Croatia ayaa kala saxiixday heshiis is-afgarad oo ku saabsan wadatashiyo siyaasadeed, kaas oo abuuraaya hannaan rasmi ah oo labada dal ay si joogto ah uga wada hadlaan xoojinta xiriirkooda diblomaasiyadeed, iskaashiga laba geesoodka ah iyo arrimaha danaha wadaagga ah.
Heshiiskan ayaa lagu saxiixay magaalada Dubrovnik ee dalka Croatia, kaddib kulan dhexmaray Wasiirka Arrimaha Dibadda iyo Iskaashiga Caalamiga ah ee Soomaaliya, Cabdisalaam Cali, iyo Wasiirka Arrimaha Dibadda iyo Arrimaha Yurub ee Croatia, Gordan Grlić Radman, intii lagu guda jiray Madasha Dubrovnik.
Labada wasiir ayaa kulankooda diiradda ku saaray xoojinta xiriirka labada dal, gaar ahaan dhinacyada siyaasadda, diblomaasiyadda, wadashaqeynta caalamiga ah iyo iskaashiga labada dowladood. Heshiiska wadatashiyada siyaasadeed ayaa la filayaa inuu furo fursado cusub oo labada dhinac ay si nidaamsan uga wada xaajoodaan arrimaha gobolka, arrimaha caalamiga ah iyo danaha labada shacab.