Soomaaliya iyo FAO oo ka wadahadlay ballaarinta barnaamijyada dhallinyarada

Soomaaliya, 8 Abriil, 2026 (Dawan) – Dowladda Soomaaliya iyo Ururka Cuntada iyo Beeraha ee Qaramada Midoobay (FAO) ayaa maalintii Talaadada yeeshay wadahadallo ku saabsan ballaarinta barnaamijyada awood-siinta dhallinyarada, si taageerada caalamiga ah loo waafajiyo Qorshaha Isbeddelka Qaranka (NTP) ee 2025–2029.

Sida aya sheegtay Wasaradda Ciyaaraha kulanka, oo ay ka qaybgaleen Agaasimaha Guud ee Wasaaradda Dhallinyarada iyo Isboortiga, Axmed Xasan Yuusuf iyo kooxaha farsamada ee FAO ee Muqdisho, ayaa dib-loogu-eegay iskaashiyada socda, gaar ahaan Mashruuca YOU ACT. Hindisahan, oo ka hawlgala magaalooyin ay ka mid tahay Jowhar, ayaa ka caawiya dhallinyarada inay horseed ka noqdaan xallinta iskahorimaadyada iyo dhismaha nabadda iyadoo loo marayo wada-hadallo bulshada dhexdeeda ah iyo hal-abuurnimo dhijitaal ah.

Wadahadalladan ayaa daba socda bilowgii Qorshaha Isbeddelka Qaranka (NTP) oo ay dowladda Soomaaliya soo saartay bishii Maarso 2025. NTP oo ah qorshe shan sano ah oo loogu talagalay in dalka looga gudbiyo horumarkii caadiga ahaa loona horseedo isbeddel baaxad leh, iyadoo horumarinta raasumaalka bulshada iyo dadka loo aqoonsaday mid ka mid ah afarta tiir ee ugu muhiimsan.

Mas'uuliyiinta ayaa sheegay in loolankan uu qayb ka yahay dedaal ballaaran oo dib loogu qaabeynayo iskaashiga ay Wasaaraddu la leedahay daneeyayaasha caalamiga ah, si loo waafajiyo mudnaanta sanadka 2026. Ujeeddada ayaa ah in loo guuro iskaashi nidaamsan oo hubinaya ka qaybgalka dhallinyarada iyo saameynta fog ee xasilloonida dalka iyo koritaanka dhaqaalaha.

Mashruuca YOU ACT waxaa xilligan fulisa hay'adda Shaqodoon, isagoo taageero ka helaya Sanduuqa Dhismaha Nabadda ee Qaramada Midoobay, waxaana si wadajir ah u maamula FAO iyo Ururka Caalamiga ah ee Socdaalka (IOM). Mashruucu wuxuu wax ka qabtaa khilaafaadka ka dhasha kheyraadka, wuxuuna xoojiyaa doorka dhallinyarada ee maamulka maxalliga ah iyo nabad dhiska.