Soomaaliya iyo hay’adaha maaliyadeed ee caalamka oo ka wada hadlay dardargelinta dib-u-habaynta dhaqaalaha

Dhanka kale, Wasiirka Maaliyadda ayaa kulan la yeeshay Agaasimaha Waaxda Bariga Dhexe iyo Bartamaha Aasiya ee IMF, Jihad Azour. Labada dhinac ayaa ka wada hadlay hirgelinta barnaamijka dib-u-habaynta dhaqaalaha Soomaaliya iyo xoojinta iskaashiga u dhexeeya dowladda iyo hay’adda. Wadahadallada lala yeeshay IMF ayaa sidoo kale diiradda lagu saaray sidii Soomaaliya ay ula tacaali lahayd saameynta isbeddellada dhaqaalaha caalamka iyo sidii loo xoojin lahaa fursadaha maalgelinta mashaariicda horumarineed ee waara.

Wasaaradda Maaliyadda ayaa intaas ku dartay in wasiirka iyo wafdigiisu ay inta uu shirku socdo kulamo kale la yeelan doonaan madaxda hay’adaha maaliyadeed ee caalamiga ah iyo wakiillada dalalka saaxiibka la ah Soomaaliya.

Wasiir Biixi ayaa sidoo kale la filayaa inuu khudbado ka jeediyo kulamada guud ee shirka sannadlaha ah, isaga oo ka hadli doona xaaladda dhaqaalaha Soomaaliya iyo tan gobolka.

Kulamadan ayaa qayb ka ah dadaallada Dowladda Federaalka Soomaaliya ay ku xoojinayso xiriirka ay la leedahay hay’adaha maaliyadeed ee caalamiga ah, iyadoo mudnaanta la siinayo dib-u-habaynta dhaqaalaha iyo helitaanka maalgelin lagu taageerayo horumarka dalka.