Muqdisho (Dawan) – Dowladda Federaalka Soomaaliya iyo Urur Goboleedka IGAD ayaa ka wada hadlay xoojinta iskaashiga dhinacyada shaqo-abuurka, fududeynta socdaalka shaqaalaha iyo horumarinta isdhexgalka gobolka, kaddib kulan dhexmaray Arbacadi Wasiirka Shaqada iyo Arrimaha Bulshada, Prof. Saalim Caliyow, iyo wafdi heer sare ah oo ka socday IGAD.
Kulanka ayaa diiradda lagu saaray xoojinta iskaashiga u dhexeeya Soomaaliya iyo IGAD, iyadoo si gaar ah looga hadlay horumarinta shaqo-abuurka, maamulka socdaalka shaqaalaha, ilaalinta xuquuqda shaqaalaha iyo kobcinta xiriirka dhaqaale ee dalalka xubnaha ka ah ururka.
Sidoo kale, labada dhinac ayaa isla soo qaaday hirgelinta Borotokoolka Xorriyadda Isu Socodka Dadka ee IGAD, kaas oo loogu talagalay in lagu fududeeyo isu socodka sharciyeysan ee dadka iyo shaqaalaha, isla markaana sare loogu qaado fursadaha shaqo iyo isdhexgalka dhaqaale ee gobolka.