Soomaaliya iyo Jarmalka oo kawada hadlay dhaqaalaha iyo doorashada

Soomaaliya, 9 Febraayo 2026 (Dawan) – Ra’iisul Wasaaraha Soomaaliya, Xamsa Cabdi Barre, ayaa maanta oo Isniin ah la kulmay wafdi heer sare ah oo ka socday Jamhuuriyadda Federaalka Jarmalka, si ay uga wada hadlaan xoojinta iskaashiga dhaqaalaha iyo amniga gobolka, sida lagu sheegay bayaan ka soo baxay Xafiiska Ra’iisul Wasaaraha.

Wafdiga oo ay horkacayeen Wasiiru-dawlaha Jarmalka ee Iskaashiga Dhaqaalaha iyo Horumarinta, Niels Annen, iyo Safiirka Jarmalka ee Soomaaliya, Sebastian Groth, ayaa wadahadallo qoto dheer kula yeeshay Ra’iisul Wasaaraha magaalada Muqdisho, kuwaas oo diiradda lagu saaray danaha wadajirka ah ee labada dal.

Xafiiska Ra’iisul Wasaaraha ayaa sheegay in Ra’iisul Wasaare Xamsa uu wafdiga warbixin ka siiyay xaaladda guud ee dalka, gaar ahaan guulaha laga gaaray hawlgallada ka dhanka ah kooxaha hubeysan ee kasoo horjeeda dowladda, iyo dadaallada lagu hirgelinayo doorashooyin toos ah oo ka bilowda dowladaha hoose.

Sidoo kale, kulanka ayaa lagu falanqeeyay saameynta abaaraha ba’an ee wali ka jira dalka, horumarka laga sameeyay dhameystirka dastuurka qaranka, iyo martiqaadka dhowaan loo fidiyay Madasha Mustaqbalka Soomaaliyeed si loo xaqiijiyo ka-qaybgal siyaasadeed oo loo wada dhan yahay.

Dhankiisa, Wasiiru-dawlaha Jarmalka Niels Annen ayaa uga mahadceliyay Ra’iisul Wasaaraha soo dhoweynta diirran, isagoo muujiyay sida ay Jarmalka uga go’an tahay sii xoojinta iskaashiga kala dhexeeya Soomaaliya, gaar ahaan dhinacyada horumarinta dhaqaalaha iyo xasillinta amniga.

Ugu dambeyn, Xafiiska Ra’iisul Wasaaraha ayaa xusay in Soomaaliya ay ka go’an tahay ka-qayb-qaadashada xasilloonida gobolka iyo tan caalamka, iyada oo ka faa’iideysanaysa doorkeeda xubinimada aan joogtada ahayn ee Golaha Ammaanka ee Qaramada Midoobay.