Pretoria, (Dawan)- Wasiirrada Arrimaha Dibadda Soomaaliya iyo Koonfur Afrika ayaa maanta oo Talaado ah ku yeeshay magaalada Pretoria wada-hadallo labo geesood ah, kuwaas oo diiradda lagu saaray xoojinta xiriirka diblomaasiyadeed iyo ballaarinta iskaashiga dhinacyada muhiimka ah ee horumarka, sida ay sheegtay Wasaaradda Arrimaha Dibadda iyo Iskaashiga Caalamiga ah ee Soomaaliya.
Wasiirka Arrimaha Dibadda iyo Iskaashiga Caalamiga ah ee Soomaaliya, Mudane Cabdisalaam Cabdi Cali, ayaa la kulmay Wasiirka Xiriirka Caalamiga ah iyo Iskaashiga ee Koonfur Afrika, Mudane Ronald Lamola, iyagoo ka wada hadlay kor u qaadista iskaashiga dhinacyada ganacsiga, waxbarashada, caafimaadka, beeraha, iyo horumarinta kheyraadka aadanaha, sida lagu sheegay bayaan ka soo baxay wasaaradda.
Wadahadallada ayaa si gaar ah diiradda loogu saaray hirgelinta tallaabooyin wax-ku-ool ah oo daba-gal ah, si loo hubiyo in iskaashigu uu keeno faa’iidooyin la taaban karo oo ay ka faa’iideystaan shucuubta labada dal.
Wasiir Cabdisalaam ayaa muujiyay qaddarinta ay Soomaaliya u hayso taageerada Koonfur Afrika ee ku aaddan madax-bannaanida, midnimada, iyo amniga Soomaaliya.
