Soomaaliya iyo Liibiya oo isku raacay xakameynta tahriibka

Soomaaliya (Dawan) — Soomaaliya iyo Liibiya ayaa Jimcihii ku yeeshay wada-hadallo heer sare ah magaalada Tripoli, iyadoo diiradda la saaray xoojinta xiriirka labada dal iyo wax ka qabashada tahriibka sharci darrada ah, sida ay sheegtay Wasaaradda Arrimaha Dibadda Soomaaliya.

Wasiirka Arrimaha Dibadda iyo Iskaashiga Caalamiga ee Soomaaliya, Cabdisalaan Cali, ayaa la kulmay ku-simaha Wasiirka Arrimaha Dibadda ee Liibiya, Taher Al-Baour.

Wadahadallada ayaa xoogga lagu saaray xaaladda tahriibka dhalinyarada Soomaaliyeed ee ku safra waddooyinka halista ah ee Liibiya, kuwaas oo wajahaya tacaddiyo iyo ka faa’iidaysi ay geystaan shabakado tahriibiyaal ah.

Sida ay wasaaraddu sheegtay, Wasiirka Soomaaliya ayaa ku adkeystay in dowladda Soomaaliya ay ka go’an tahay la shaqeynta Liibiya si loo yareeyo tahriibka sharci darrada ah, loo burburiyo shabakadaha dambiyada abaabulan, isla markaana loo xoojiyo ilaalinta muwaadiniinta Soomaaliyeed.

Mas’uuliyiinta ayaa sheegay in ku dhawaad 400 oo muwaadiniin Soomaaliyeed lagu wado in dib loogu soo celiyo dalka maalmaha soo socda, halka in ka badan 2,000 oo kale horey loo soo celiyay sanadkii hore.

Sidoo kale, labada dhinac ayaa ka wada hadlay xaaladaha gobolka iyo kuwa caalamka, iyagoo isku raacay in la sii xoojiyo iskaashiga iyo wada-shaqeynta si loo taageero xasilloonida iyo danaha labada dal.