Muqdisho (Dawan) — Wasiirka Warfaafinta, Dhaqanka iyo Dalxiiska ee Dowladda Federaalka Soomaaliya, Cabdifitaax Qaasim Maxamuud, ayaa sabtidii xafiiskiisa ku qaabilay Robert Flannery, oo ah la-taliyaha Barnaamijka La-dagaallanka Argagixisada ee Mareykanka u qaabilsan Bariga Afrika.
Kulanka ayaa diiradda lagu saaray xoojinta iskaashiga Soomaaliya iyo Mareykanka ee dhanka isgaarsiinta la xiriirta la-dagaallanka argagixisada, wacyigelinta dadweynaha, ka hortagga dacaayadaha argagixisada iyo fikradaha xagjirka ah, iyo isku-duwidda farriimaha dowladda ee ku saabsan dadaallada lagula dagaallamayo argagixisada.
Wasiir Cabdifitaax Qaasim Maxamuud ayaa carrabka ku adkeeyay muhiimadda ay leedahay in la sameeyo istaraatiijiyad warbaahineed oo mideysan, la hirgeliyo ololeyaal wax-ku-ool ah oo wacyigelin dadweyne ah, isla markaana la xoojiyo iskaashiga labada dal. Wuxuu sheegay in tallaabooyinkaas ay bulshada Soomaaliyeed siin karaan xog sax ah, korna u qaadi karaan fahamkooda iyo ka-qaybgalka dadaallada lagula dagaallamayo argagixisada.