Brussels (Dawan)— Wasiirka Gaashaandhigga Soomaaliya, Axmed Macallin Fiqi, ayaa shalay magaalada Brussels kula kulmay mas’uuliyiin sare oo ka tirsan Midowga Yurub, iyagoo ka wada hadlay xoojinta iskaashiga amniga iyo difaaca iyo qorshaha Soomaaliya ee la wareegidda mas’uuliyadda amniga dalka.
Sida ay sheegtay Wasaaradda Gaashaandhigga Soomaaliya, kulammadu waxay qabsoomeen intii ay socotay Madasha saddexaad ee Schuman ee Amniga iyo Difaaca, oo 17 iyo 18-kii Nofeembar ka dhacday magaalada Brussels ee dalka Belgium.
Wasiir Fiqi ayaa la kulmay David Cvach, Ku-xigeenka Xoghayaha Guud ee Arrimaha Nabadda, Amniga iyo Difaaca ee Adeegga Arrimaha Dibadda ee Midowga Yurub, iyo Patricia Llombart Cussac, oo hay’adda u qaabilsan arrimaha Afrika.
Wadahadallada ayaa diiradda lagu saaray istaraatiijiyadda Soomaaliya ee la wareegidda mas’uuliyadda amniga, xaaladda amni ee gobolka iyo sidii loo sii xoojin lahaa iskaashiga Soomaaliya iyo Midowga Yurub.