Muqdisho (Dawan)— Guddoomiyaha Hay’adda Maareynta Musiibooyinka Qaranka ee Soomaaliya (SoDMA), Maxamuud Macallin Cabdulle, ayaa kulan la yeeshay Xoghayaha Guud ee Golaha Qaxootiga Norway (NRC), Jan Egeland, kaas oo looga hadlay xaaladda bani’aadantinimo ee dalka iyo u-diyaargarowga musiibooyinka.
Kulanka ayaa diiradda lagu saaray abaaraha, fatahaadaha, colaadaha, barakaca, cunto-yarida iyo khatarta cimilada ee loo yaqaan Super El Niño, sida ay sheegtay SoDMA.
Labada dhinac ayaa sidoo kale ka wada hadlay sidii loo xoojin lahaa awoodda Soomaaliya ee u-diyaargarowga iyo ka jawaabista musiibooyinka, iyadoo la eegayo khataraha bani’aadantinimo ee soo noqnoqda.
Egeland ayaa booqday xarunta SoDMA, halkaas oo uu ku kormeeray howlaha hay’adda ee la xiriira digniinta hore, gurmadka degdegga ah iyo xoojinta adkeysiga bulshada.
