Islamabad (Dawan)– Soomaaliya iyo Pakistan ayaa kala saxiixday is-afgarad iskaashi (MoU) oo lagu xoojinayo wada-shaqeynta dhinacyada difaaca, amniga iyo horumarinta awoodaha ciidamada, sida ay sheegtay Wasaaradda Gaashaandhigga Soomaaliya maanta oo Talaado ah.
Sida lagu sheegay war-saxaafadeedka wasaaradda, is-afgaradka ayaa magaalada Islamabad waxaa ku kala saxiixday Wasiirka Gaashaandhigga Soomaaliya, Axmed Macallin Fiqi, iyo Wasiirka Difaaca Pakistan, Khawaja Muhammad Asif, intii uu Fiqi ku guda jiray booqasho rasmi ah oo uu ku tagay Pakistan.
Is-afgaradka ayaa dhigaya in labada dal ay iska kaashadaan la-dagaallanka argagixisada, tababarrada ciidamada, is-weydaarsiga khibradaha iyo aqoonta milatari, horumarinta awoodaha difaaca iyo xoojinta iskaashiga dhinaca amniga, sida ay sheegtay wasaaraddu.