Muqdisho (Dawan) – Madaxweynaha Soomaaliya, Xasan Sheekh Maxamuud, iyo madaxa gargaarka bani’aadannimada ee Qaramada Midoobay, Tom Fletcher, ayaa kulan ku yeeshay Muqdisho, iyagoo ka wada hadlay hoos u dhaca maalgelinta iyo caqabadaha dhaqaale ee saameynaya dalka, sida ay sheegtay Qaramada Midoobay.
Fletcher, oo ah Ku-xigeenka Xoghayaha Guud ee QM u qaabilsan Arrimaha Bani’aadannimada iyo Isku-duwaha Gargaarka Degdegga ah, ayaa sheegay in kulanka lagu falanqeeyay fursadaha iyo caqabadaha horyaalla Soomaaliya.
“Waxaan ka wada hadalnay khataro halis ah oo hor istaagi kara horumarka, oo ay ka mid yihiin abaaraha, fatahaadaha, colaadaha iyo hoos u dhaca maalgelinta,” ayuu Fletcher ku yiri qoraal uu ku daabacay barta X Talaadadii.
