Nairobi (Dawan)— Soomaaliya iyo Sweden ayaa daah-furay mashruuca CAPSOM II, kaas oo lagu xoojinayo awoodda Soomaaliya ee taageerada muwaadiniinta dalka dib ugu soo laabanaysa, sida ay sheegtay Hay’adda Qaranka ee Qaxootiga iyo Barakacayaasha (NCRI).
Mashruuca ayaa lagu daah-furay magaalada Nairobi Arbacadii, waxaana diiradda lagu saari doonaa xoojinta awoodda hawlgal ee NCRI iyo horumarinta nidaamyada lagu maareeyo soo-celinta iyo dib-u-dhexgalka muwaadiniinta Soomaaliyeed.
Mashruuca waxaa iska kaashanaya Hay’adda Iskaashiga Horumarinta Caalamiga ah ee Sweden (Sida), Hay’adda Socdaalka Sweden iyo NCRI.
Munaasabadda daah-furka waxaa ka qaybgalay wakiillo ka socday dowladda federaalka Soomaaliya, ururrada bulshada rayidka ah, Midowga Yurub iyo hay’adaha caalamiga ah ee fadhigoodu yahay Nairobi. Ka qaybgalayaashu waxay ka wada hadleen muhiimadda ay leedahay in la sameeyo nidaamyo waara oo lagu taageero Soomaalida soo laabanaysa, oo ay ka mid tahay abuurista fursado shaqo.
Guddoomiyaha NCRI, Liibaan Cabdi Cigaal, ayaa sheegay in mashruucu ka koobnaan doono tababarro loo fidiyo shaqaalaha hay’adda iyo taageero la siiyo muwaadiniinta soo laabanaysa, oo ay ka mid yihiin waxbarasho, shaqo, caafimaad iyo maalgashi.
