Rome (Dawan)– Wasiirka Kalluumeysiga iyo Dhaqaalaha Buluugga ah ee Xukuumadda Federaalka Soomaaliya, Axmed Xasan Aadan, ayaa magaalada Rome kaga qeybgalay kulan looga hadlay dardargelinta iskaashiga Soomaaliya iyo Talyaaniga ee horumarinta wax-soo-saarka kalluunka, sida ay sheegtay Wasaaradda Kalluumeysiga iyo Dhaqaalaha Buluugga ah.
Kulanka oo lagu qabtay Villa Agrippina, isla markaana ay martigelisay hay’adda Assoittica Italia oo ka shaqeysa arrimaha kalluumeysiga Talyaaniga, waxaa ka qeybgalay mas’uuliyiin, khubaro iyo daneeyayaal ka tirsan waaxda kalluumeysiga.
Wasiirka ayaa sheegay in iskaashiga labada dal uu ka gudbayo heerka qorsheynta una gudbayo hirgelin, isagoo xusay in Soomaaliya ay leedahay xeeb dhererkeedu gaarayo ku dhowaad 3,800 kiiloomitir iyo khayraad badeed oo ballaaran oo u baahan in si waara looga faa’iideysto.
Waxa uu tilmaamay in caqabadaha ay ka mid yihiin kalluumeysiga sharci-darrada ah, kaabayaal aan ku filneyn iyo suuqyo xaddidan ay muddo saameyn ku yeesheen horumarinta waaxda kalluumeysiga Soomaaliya.
