Muqdisho (Dawan) – Soomaaliya iyo Talyaaniga ayaa maanta oo Jimco ah ka wada hadlay xoojinta iskaashiga dhinacyada socdaalka iyo maamulka xuduudaha, kadib kulan ka dhacay magaalada Muqdisho oo u dhexeeyay Madaxweynaha Jamhuuriyadda Federaalka Soomaaliya Xasan Sheekh Maxamuud iyo Wasiirka Arrimaha Gudaha Talyaaniga Matteo Piantedosi.
Kulanka oo ka dhacay Villa Soomaaliya ayaa diiradda lagu saaray xoojinta iskaashiga amniga, maamulka socdaalka, horumarinta hay’adaha dowladda iyo guud ahaan xiriirka istaraatiijiga ah ee labada dal.
Sida ay sheegtay Madaxtooyada Soomaaliya, labada dhinac ayaa isla soo qaaday ballaarinta iskaashiga arrimaha mudnaanta wadaagga ah, gaar ahaan isku-duwidda amniga iyo horumarinta nidaamka maamulka xuduudaha.
Madaxweyne Xasan Sheekh Maxamuud ayaa sheegay in Soomaaliya ay muhiimad gaar ah siinayso xiriirka taariikhiga ah ee kala dhexeeya Talyaaniga, isagoo xusay in iskaashiga labada dal uu muhiim u yahay xoojinta hay’adaha dowladda, amniga iyo horumarka guud ee dalka.
