Soomaaliya iyo Turkiga oo heshiis isgaarsiineed ku kala saxiixday Ankara

Ankara (Dawan)– Soomaaliya iyo Turkiga ayaa Isniinti kala saxiixday heshiis iskaashi dhanka isgaarsiinta ah, kaas oo fursad u siinaya shirkadaha Turkiga inay ka shaqeeyaan mid ka mid ah suuqyada isgaarsiinta ee ugu firfircoon Afrika.

Hay’adda Isgaarsiinta Qaranka (NCA) iyo Hay’adda Tignoolajiyada Warfaafinta iyo Isgaarsiinta ee Turkiga (BTK) ayaa heshiiskan is-afgarad (MoU) ku kala saxiixday xarunta dhexe ee BTK. Waxaa hay’adahaas matalay Maareeyaha Guud ee NCA, Mustafa Yaasiin Sheekh, iyo Guddoomiyaha BTK, Ömer Abdullah Karagözoğlu.

Heshiiskani waxa uu daboolayaa dhinacyada nidaaminta isgaarsiinta dayax-gacmeedka, amniga internet-ka, maaraynta hirarka, kaabayaasha internet-ka , amniga shabakadaha, iyo maamulka internet-ka.

Suuqa isgaarsiinta ee Soomaaliya ayaa ka soo baxay tobanaan sano oo aanay jirin kormeer dowladeed, wuxuuna noqday mid ka mid ah suuqyada ugu tartanka badan Afrika. Shirkadaha gaarka loo leeyahay sida Hormuud Telecom, Somtel, Golis Telecom, iyo Telesom ayaa bixiya adeegyo taleefan oo qiimo jaban iyo nidaamyada lacagta moobilka ee ugu casrisan.

Heshiiskan MoU-ga ah ayaa calaamad u ah xiisaha sii kordhaya ee Turkiga u qabo dhaqaalaha dhijitaalka ah ee Soomaaliya. Shirkadaha Turkiga ayaa sahamiyay fursadaha kaabayaasha internet-ka ee fiber-ka, xarumaha xogta (data centers), iyo kaabayaasha dayax-gacmeedka, iyagoo ka duulaya maalgashiga ballaaran ee Ankara ee dekedaha, waddooyinka, isbitaallada, iyo saldhigga milatari ee Muqdisho.

Ömer Abdullah Karagözoğlu ayaa sheegay: “Wada-shaqayntan ujeedadeedu waa dhiirrigelinta is-dhaafsiga aqoonta, khibradda nidaaminta, iyo dhaqamada ugu wanaagsan, si aan u taageerno qaybaha isgaarsiinta ee adkeysiga leh mustaqbalka Turkiga iyo Soomaaliya labadaba.”

Dhankiisa, Mustafa Yaasiin Sheekh ayaa xusay: “Heshiiskani wuxuu xoojinayaa iskaashiga hay’adaha, taageerayaa dhisidda awooda shaqaalaha, is-dhaafsiga aqoonta, iyo hagaajinta qaab-dhismeedka nidaaminta, taasoo ka qeyb qaadanaysa kobaca iyo casriyaynta qaybta isgaarsiinta ee Soomaaliya.”

Ka dib saxiixa heshiiska, wafdiga Soomaalida ayaa wadahadallo farsamo la yeeshay mas'uuliyiinta BTK iyo hay’ado kale oo Turkiga ka tirsan, iyagoo diiradda saaray nidaaminta, amniga internet-ka, iyo ilaalinta macaamiisha.