Muqdisho (Dawan)– Xafiiska Dhiirigelinta Maalgashiga Soomaaliya (SOMINVEST) iyo safaaradda Turkiga ayaa u dhaqaaqay xoojinta iskaashiga dhaqaale, kadib wadahadallo heer sare ah oo looga golleeyahay kordhinta socodka maalgashiga iyo horumarinta xiriirka labada dhinac, sida ay sheegeen mas’uuliyiinta SOMINVEST Arbacadii.
Agaasimaha SOMINVEST, Maxamed Dubo, iyo wafdi uu hoggaaminayo ayaa la kulmay safiirka Turkiga ee Soomaaliya, Alper Aktaş, iyo kooxdiisa dhaqaalaha, si ay u sahamiyaan hindisayaal maalgashi oo cusub iyo sidii loo ballaarin lahaa ka-qaybgalka qaybta gaarka ah.
"Ballanqaadka joogtada ah ee Turkiga wuxuu ka tarjumayaa kalsoonida lagu qabo awoodda dhaqaale ee Soomaaliya,” ayuu yiri Dubo kadib kulanka, isaga oo sii raaciyay hadalkiisa “Waxaan diiradda saaraynaa in iskaashigan loo beddelo maalgashi muuqda oo horseeda koboc dhaqaale, abuura shaqooyin, isla markaana taageera horumar waara.”
Sida uu xafiisku sheegay, labada dhinac ayaa mar kale xaqiijiyay iskaashiga sii kordhaya ee u dhexeeya Soomaaliya iyo Turkey, iyagoo muujiyay doorka Ankara oo ah mid ka mid ah xulafada ugu muhiimsan ee dhinaca dhaqaalaha ee Muqdisho. Shirkadaha Turkiga ayaa saamayn xooggan ku leh qaybaha muhiimka ah sida kaabayaasha dhaqaalaha, dhismaha, saadka (logistics), wax-soo-saarka, iyo maamulka dekedaha.