Muqdisho (Dawan)– Lataliyaha Amniga Qaranka ee Jamhuuriyadda Federaalka Soomaaliya, Danjire Aweys Xaaji Yuusuf, ayaa maanta magaalada Muqdisho kulan kula yeeshay Danjiraha Jamhuuriyadda Türkiye u fadhiya Soomaaliya, Alper Aktaş, sida lagu sheegay war uu baahiyay Telefishinka Qaranka Soomaaliyeed.
Sida uu TV-gu sheegay , kulanka ayaa diiradda lagu saaray xoojinta iskaashiga dhinacyada amniga iyo dadaallada wadajirka ah ee la xiriira la dagaallanka argagixisada. Labada mas'uul ayaa sidoo kale ka wada hadlay sidii loo sii dardargelin lahaa xiriirka istaraatiijiyadeed iyo iskaashiga soo jireenka ah ee ka dhexeeya Soomaaliya iyo Türkiye.
Bayaanka ayaa intaas ku daray in kulanka lagu falanqeeyay hababka lagu horumarin karo wada shaqeynta hay'adaha amniga ee labada dal, iyadoo la adkeynayo iskaashiga lagu xoojinayo amniga iyo xasilloonida.
