Soomaaliya: Jamaaco Suufi ah oo Mawliidka ku xusaysa in ka badan 1,500 geel

Soomaaliya (Dawan) – 22 Agoosto 2026 — Muuqaal si weyn indhaha u soo jiitay ayaa ku faafay baraha bulshada ee Soomaaliya, iyadoo taageerayaasha Sheekh Maxamed Nuur Bukhaari ay boqolaal geel ah isagu geeyeen xarunta jamaacada, halka ay lagu galbinayay salligga Nabiga iyo nabi amaan.

Raxanno geel ah ayaa si isdaba joog ah ugu dhex socda dadka isugu soo baxay goobta, taasoo ka mid ah muuqaalada ugu waaweyn ee lagu arko diyaar-garowga jamaacada Suufiyada ee xuska dhalashada Nabi Muxammad Nabad gelyo iyo Naxariis Korkiisa Ha-ahaatee (NNKH).

Halka dalal badan oo Carbeed iyo Islaami ah xuska Mawliidka looga xusaa macmacaan iyo caadooyin bulsheed oo kala duwan, jamaacada Sheekh Bukhaari waxay munaasabadda u xustaa qaab ka duwan, iyadoo geelu uu yahay qaybta ugu muuqata ee xuska, waxaana weheliya goobo cunto oo furan, xus, ducuo iyo amaanta Nabiga.

Jamaacadu waxay sannad kasta sidan ugu xustaa Mawliidka inta lagu jiro bisha Rabiicul Awal. Taageerayaasha Sheekh ayaa keena tiro badan oo geel ah, kuwaas oo markii dambe la qalo, cuntana laga diyaariyo, kadibna lagu bixiyo goobo cunto oo dadka loogu talagalay.

Sanadkan, jamaacadu waxay u qoondeysay in ka badan 1,500 geel xuska Mawliidka, kuwaas oo ay bixiyeen taageerayaasha Sheekh Bukhaari. Geela ayaa loo qaybinayaa xarunta jamaacada iyo xarumaha dariiqooyinka kale ee ka qeyb qaadanaya xuska.

Xuska ayaa soconaya inta lagu jiro bisha Rabiicul Awal, iyadoo cunto-bixinta ay weheliyaan kulamo xus ah, fadhi lagu akhriyo nabi amaan lagu ammaanayo Nabi Muxammad (NNKH).

Sheekh Maxamed Nuur Bukhaari ayaa ka mid ah hoggaamiyeyaasha ugu caansan dariiqooyinka Suufiyada ee Soomaaliya. Waxaa sidoo kale lagu yaqaan inuu akhriyo kutubta waaweyn ee xadiiska, oo uu ka mid yahay Saxiixul Bukhaari, kaas oo uu ka akhrin jiray qaybo ka mid ah Soomaaliya iyo Itoobiya, taasoo la xiriirta naanaysta “Bukhaari” ee uu ku caan baxay.

Sida ay sheegeen taageerayaasha Sheekh Bukhaari, doorashada geela ee dhaqankan ma ahan mid iska timid. Waxay tilmaamayaan in geelu yahay mid ka mid ah hantida ugu qaalisan ee Soomaalidu leedahay, isla markaana ay ku faanaan. Sidaas darteed, waxay u arkaan bixinta geela ee xuska Mawliidka inay tahay muujin jacayl ay u qabaan Nabi Muxammad (NNKH).

Marka raxannada geelu ay mid mid u soo gaaraan xarunta jamaacada, iyadoo ay hareeraha ka yeerayaan salliga Nabiga iyo ducooyinka kale , goobtu waxay isu beddeshaa muuqaal ka duwan xusaska Mawliidka ee dalal badan.

Hantida ugu qaalisan ee Soomaalida, oo ah geela, ayaa halkan loogu beddelaa cunto lagu wadaago miisas furan oo dadka isu keena inta lagu jiro bisha Rabiicul Awal, taasoo taageerayaasha Sheekh Bukhaari ay u arkaan muujin jacayl iyo xushmad ay u hayaan Nabi Muxammad (NNKH).

Soomaaliya: Jamaaco Suufi ah oo Mawliidka ku xusaysa in ka badan 1,500 geel

Maxaa sababay in ciyaariyahan Cali Cabdi Daahir laga mamnuuco kubadda Cagta muddo sanad ah ?

Sacuudiga oo taageeraya mashruuc horumarinta beeraha Soomaaliya oo ay ka faa’iideysanayaan 4,800 qof

Puntland oo dalbatay jawaab ku saabsan duqeymaha Garmaal ee burcad-badeedda lala xiriiriyay

Golaha Mustaqbalka oo iska fogeeyay kulan Khamiistii dhex maray Shariif iyo Farmaajo

Maqaallo La Xidhiidha

Qodobada ugu muhiimsan ee Wararka Dawan

Booliska Hirshabeelle oo Mahadaay ku dilay laba xubnood oo ka tirsanaa Al-Shabaab

Markab Shidaal oo lagu afduubtay Gacanka Cadmeed

Qaybaha

Qoraallo Cusub

Maxaa sababay in ciyaariyahan Cali Cabdi Daahir laga mamnuuco kubadda Cagta muddo sanad ah ?

Sacuudiga oo taageeraya mashruuc horumarinta beeraha Soomaaliya oo ay ka faa’iideysanayaan 4,800 qof

Soomaaliya: Jamaaco Suufi ah oo Mawliidka ku xusaysa in ka badan 1,500 geel